Proverbs 3

Eminye Njalo Imivuzo Emihle Yokuhlakanipha

1Ndodana yami, ungakhohlwa imfundiso yami,
kodwa ugcine imilayo yami enhliziyweni yakho,
2ngoba izakwandisa impilo yakho okweminyaka eminengi,
ikuphe ukuthula.

3Akungasuki kuwe loba nini uthando lokuthembeka;
kubophele entanyeni yakho,
ukubhale egwalibeni lenhliziyo yakho.
4Ngalokho uzathandeka uzuze ibizo elihle
emehlweni kaNkulunkulu laphambi kwabantu.

5Themba kuThixo ngenhliziyo yakho yonke,
ungathembi ekuzwisiseni kwakho;
6mvume kuzozonke izindlela zakho,
yena uzaqondisa zonke izindlela zakho.

7Ungazenzi ohlakaniphileyo ngokubona kwakho;
yesaba uThixo uxwaye okubi.
8Lokho kuzawuphilisa umzimba wakho
kuwaqinise lamathambo akho.

9Dumisa uThixo ngenotho yakho;
ngezithelo zakho zokuqala zonke;
10ngalokho iziphala zakho zizagcwala ziphuphume,
lezimbiza zakho zewayini zize zichitheke ngewayini elitsha.

11Ndodana yami, ungeyisi ukulaya kukaThixo
njalo ungacaphukeli ukukhuza kwakhe,
12ngoba uThixo ulaya labo abathandayo,
njengoyise elaya indodana yakhe ayithandayo.

13Ubusisiwe umuntu ozuza ukuhlakanipha,
umuntu ozuza ukuqedisisa,
14ngoba khona kulenzuzo eyedlula isiliva
lenzuzo eyedlula igolide.
15Kuligugu elidlula amarubhi;
kakukho okuloyisayo okungalinganiswa lakho.
16Impilo ende isesandleni sakho sokunene;
kwesokhohlo kulenotho lodumo.
17Izindlela zakhe zilokuthokoza,
lemikhondo yakhe ilokuthula.
18Kuyisihlahla sokuphila kulabo abakwamukelayo;
labo abakuphathayo bazabusiswa.

19Ngokuhlakanipha uThixo wabeka izisekelo zomhlaba,
ngokuqedisisa wamisa izulu endaweni yalo;
20ngolwazi lwakhe inlwandle zehlukaniswa,
lamayezi athontisa amazolo.

21Ndodana yami, gogosa ingqondo ehlela ngolwazi,
ungayekeli kukucatshele;
22kuzakuba yikuphila kuwe,
kube ngumceciso omuhle entanyeni yakho.
23Lapho-ke uzahamba ngendlela evikelweyo
unyawo lwakho lungakhubeki;
24nxa ulala kawuyikwesaba;
uzalala ubuthongo obumnandi.
25Ungabi lovalo nxa ujunywa ngumonakalo
kumbe yikubhidlika lokho okwehlela ababi,
26ngoba uThixo uzakuba lithemba lakho
avikele unyawo lwakho emjibileni.

27Ungaze wala ukusiza labo abadinga uncedo,
wena ulakho ongabasiza ngakho.
28Ungabokuthi kumakhelwane wakho:
“Ubobuya kwesinye isikhathi; ngizakunika kusasa”
wena ulalo lololutho.
29Ungacebi okubi ngomakhelwane wakho,
ohlezi lawe ekwethemba.
30Ungaxabani lomuntu kungelasizatho
yena engakonelanga ngalutho.

31Ungamhawukeli umuntu othanda ukulwa
loba nje ufise lakuphi ukwenza kwakhe,
32ngoba uThixo uyamenyanya umuntu oxhwalileyo
kodwa oqotho umbeka ekhwapheni lakhe.
33Isiqalekiso sikaThixo sehlela endlini yababi,
kodwa uyayibusisa indlu yabalungileyo.
34Uyabahleka usulu abayizideleli ezizithembayo,
kodwa abe lomusa kwabathobekileyo.
35Abahlakaniphileyo baphiwa udumo
kodwa abayiziwula ubathela ihlazo.